Мәжілісте орнықты қаржыландыру мен ESG-бастамаларды қолдау жөніндегі ұсыныстар қаралды
ҚР Парламенті Мәжілісінде «Көміртекті инвестициялауға арналған климаттық заңнаманы жетілдіру» атты сарапшылық семинар өтті. Ұйымдастырушылар ретінде «Жасыл Академия» ҒЗО және ҚР Экология және табиғи ресурстар министрлігі ЭЫДҰ және SIPA/IDDRI (Франция) жобасының қолдауымен сөз сөйледі.
Семинардың екі сессиясы аясында Бахыт Есекенова мен Юлия Якупбаева модератор болды. Сарапшылардың Экология кодексін жаңарту, Қазақстанның көміртек жобаларын халықаралық нарықтарға (VCM, 6-бап) интеграциялау және елдің көміртекті кредиттеу саласындағы әлеуетін арттыру жөніндегі ұсыныстары талқыланды.
Іс-шарада сарапшылардың баяндамаларында негізгі лейтмотив ретінде экономиканы көміртексіздендіру үшін инвестициялар тапшылығы тақырыбы айтылды. GIZ есептеулері бойынша, Қазақстан экономикасының орнықты көміртексіз болуына 2060 жылға дейін 660 млрд АҚШ доллары, 2030 жылға дейін – 90 млрд АҚШ доллары қажет.
Талқылау қорытындысы бойынша Көміртегі бейтараптылығына жол жеткізу жөніндегі жол картасын қабылдауды жеделдету және Климаттық саясат жөніндегі агенттік құруды қарастыру жөнінде ұсынымдар қабылданды.
«Атамекен» ҰКП жанындағы Орнықты даму және ESG кеңесінің төрағасы Юлия Якупбаева мәселеге жүйелі қарау керектігін айтты.
«Орнықты экономиканы дамыту жобаларын қолдаудың негізгі шараларының бірі орнықты және жасыл бағалы қағаздарды шығару ынталандырулары, сондай-ақ орнықты кредит беру болып табылады. Осыған байланысты бұл шараларды қайта жаңғыртып, кеңейтуді маңызды деп санаймыз» - деді ол.
Сондай-ақ, қатысушылар ESG-есептілікті қалыптастыратын және жасыл таксономия қағидаттарын енгізетін нақты сектор компаниялары үшін ынталандыруларды пысықтауды, көміртек квоталарымен ұлттық сауда жүйесіне көзқарастарды қайта қарау мәселелерін көтерді. Ұсынымдар ҚР Үкіметіне жолданатын болады.
Гибридті форматта семинарға мемлекеттік органдардың, бизнестің және халықаралық ұйымдардың 80-нен астам өкілі қатысты.
Пікір қалдыру:
Пікірлер: