Болашаққа жасалған қадам: Қордай ауданының жоғары сынып оқушылары жұмысшы мамандықтарымен танысуда
«Жұмысшы мамандықтар жылы» аясында ұйымдастырылған кәсіби бағдарлау бағдарламасы шеңберінде Қордай ауылының Қаныш Сәтбаев атындағы орта мектебінің 10-сынып оқушылары үшін «СПК Қордай-Корм» өндірістік кооперативінің құрама жем зауытына танымдық экскурсия ұйымдастырылды. Бұл шара жастардың қазіргі заманғы мамандықтар мен жергілікті кәсіпорындардағы жұмыс мүмкіндіктері туралы ақпараттануын арттыруға бағытталған кешенді бастаманың бір бөлігі болды.
Экскурсия кәсіпорын басшысы Талғат Сәрсембаев пен «Атамекен» ҰКП аудандық филиалының директоры Ержан Аденнің құттықтау сөздерінен басталды.
«Бүгінгі экскурсия сіздерге ауыл шаруашылығы саласының тиімділігі мен жануарлардың денсаулығына тікелей әсер ететін өнімдердің қалай өндірілетінін өз көздеріңізбен көруге мүмкіндік береді деп үміттенеміз», – деді Талғат Сәрсембаев.
.jpg)
Оқушыларға шикізатты қабылдаудан бастап дайын өнімді қаптауға дейінгі өндірістік тізбек бойынша жан-жақты экскурсия ұйымдастырылды. Әсіресе ірі және ұсақ малға, жылқыға, құс пен балыққа арналған толық рационды құрама жем өндірісіне ерекше назар аударылды. Оқушылар өндіріс технологиясы, еңбек жағдайы мен жалақы деңгейі туралы белсенді түрде сұрақтар қойып, үлкен қызығушылық танытты.
Болашақ қызметкерлерге қойылатын талаптар мен әлеуметтік жағдайлар туралы сұраққа жауап бере отырып, Талғат Сәрсембаев былай деді:
«Біз үшін қызметкерлердің тек қажетті дағдыларға ие болуы ғана емес, сонымен қатар жұмыс орнында өздерін жайлы сезінуі де маңызды. Біз үздіксіз оқуға және кәсіби дамуға жағдай жасауға тырысамыз».
Экскурсия естелік суретке түсумен аяқталды. Қатысушылар ұйымдастырушыларға нақты өндіріс орнымен танысуға мүмкіндік бергені үшін алғыс білдірді.
«Өте қызықты болды. Қазіргі заманғы зауыт жұмысы туралы көп нәрсе білдік», – деп бөлісті оқушылардың бірі.
.jpg)
Кәсіби бағдарлау апталығы аясында құрама жем зауытынан бөлек, аудандағы мектептерде тағы екі кездесу өтті.
Ахмет Байтұрсынов атындағы №51 орта мектепте жоғары сынып оқушылары «СК Достық К» және «Стандарт Бетон» ЖШС құрылыс компанияларының басшысы Ерғазы Құсайыновпен кездесті. Әңгіме барысында сапалы бетон өндірісі, саладағы кадр тапшылығы және құрылыс саласындағы мансаптық мүмкіндіктер жайлы сөз болды.
«Құрылыс – ең сұранысқа ие салалардың бірі. Бізге білікті мамандар ауадай қажет, сондықтан сіздердің біреуіңіз біздің командамыздың мүшесіне айналады деп сенемін», – деді Ерғазы Құсайынов.
Келесі кездесу Тұрар Рысқұлов атындағы №23 мектепте өтті. Онда оқушылар «Izgi is Qordai» жиһаз компаниясының директоры Әлібек Омармен сұхбаттасты. Ол қазіргі жиһаз өнеркәсібінің жағдайы жайында айтып, заманауи технологиямен жұмыс істей алатын мамандардың тапшылығына тоқталды.
«Қазір салаға үйренуге және дамуға дайын адамдар өте қажет. Біз жаңа кадрларға да, жаңа идеяларға да ашықпыз», – деді Әлібек Омар.
.jpg)
.jpg)
Әсіресе, Альжан ана ауылының мектебінде өткен кездесу есте қаларлық әрі әсерлі өтті. Шара кәсіпкерлер мен оқушылардың қатысуымен еркін форматтағы сұхбат ретінде өтті. Мектеп қонақтарды қабылдауға мұқият дайындалған — акт залында гүлдермен безендірілген, «Кәсіпкермен кездесу» стендімен рәсімделген салтанатты атмосфера орнады.
«Мұндай кездесудің өткеніне өте қуаныштымыз. Бұл – кәсіпкерлермен тікелей сөйлесіп, маңызды сұрақтарға жауап алудың бірегей мүмкіндігі», – деп өз әсерімен мектеп оқушысы бөлісті.
Жалпы іс-шараларға 115 жоғары сынып оқушысы қатысты. Кәсіби бағдарлау кездесулері жастарды саналы түрде мамандық таңдауға дайындауда және өңір экономикасының сұранысқа ие бағыттарымен таныстыруда маңызды қадам болды.
Пікір қалдыру:
Пікірлер: